མེ་ལྕེའི་གདུག་རྩུབ།

གཅེས་རྟེན་བཟང་དག་ཉིད་བརྩེ་མེད་མེ་ལྕེར་བརླགས་པར་གཅེས།

གདུང་འདི་ན་འཁྱམས་པོའི་ལ་རྒྱའི་རྣོ་སྐྱེན་ཚོར་བུ་གདུང་།

ཚོར་ཁྱེད་དག་ཐབས་བྲལ་བརྟུལ་ཞུགས་ལས་འཕོས་བདེན་དོན་ཚོར།

ཤུགས་གདུང་བའི་སྨྲེ་ངག་དང་འགྲོག་ཕངས་ཚོར་སྐྱབས་འཇུག་ཤུགས།

 

བདེན་བདེན་འདི་ཉིད་བདེན་བདེན་དེ་ནས་འདིར་འཕངས་རེ་མདངས་གསོན།

འོན་ཀྱང་བདེན་ངག་ལོག་འགྲེལ་སྐྱ་ཐིག་འདེབས་པའི་རྩོལ་བར་མཚར།

རེ་གསོན་སྐྱོང་བའི་གོང་བུའི་ནུས་མཆོག་ད་མཁོ་ན་ཡང་དབེན།

འཕྱ་སྨོད་མཁས་ཤིང་འཐེན་འཁྱེར་མྱོས་རྟགས་ད་དུང་ལྷག་པར་མཚར།

 

དེ་བས་འཛད་མེད་རེ་ཞགས་ནར་མར་རྗེས་ཆགས་འགུལ་མེད་མཚར།

འཚེ་མེད་འདི་ན་མགོ་སྨད་གདེང་བྲལ་ཇི་ལྟར་ཕས་ཚུལ་གཉེར།

འོན་ཏང་ནང་ཁུལ་སྟག་འགྲན་ངར་སྒྲས་དོན་གྱི་གོ་རྒྱ་འོན།

 

ད་ནི་རིག་སློབ་མཚོན་ཆ་ཐོགས་ཤིང་གོང་བུའི་ནུས་མཆོག་སྐྱེད།

 

ཉེ་རིང་བག་མེད་ཅི་ལྟར་ཕལ་གཤིས་ན་ཡང་འདི་ན་མིན།

 

འདིར་མཁོ་བ་ནི་སྐྱོར་རོགས།

འདིར་མཁོ་བ་ནི་ནུས་མཆོག

དེ་བཞིན་དོན་ལྡན་པའི་འཚོ་བ།

རིག་སྟོབས་ཀྱི་གོ་འཕང་རྒྱས།

རེ་གསོན་གྱི་འབེན་དུ་ཁེལ་བ།

ལ་རྒྱའི་བུར།

སེམས་གསོན་པོ་ཞིག་བར་བར།

ཏེ་ཐོལ་བྱུང་དུ་ལྡང་འགྲོས།

གང་གསོ་དལ་གྱི་བར་སེང་།

ཙམ་མིན་པར་སྣེ་རྒྱུན་འཛིན།

རེད་དལ་རྟེན་གྱི་སྙིང་པོ།

གཞན་རང་སྐལ་གྱི་རིག་སྟོབས།

ཅི་ཆུད་ཟོས་ལས་བརྡར་ཤའི།

རྣོ་རང་གཞན་གྱི་ལེགས་སྐྱེས།

སྒོས་མི་རིགས་འདིའི་ཆག་འཇིག

ཅི་ལ་རྒྱའི་བུ་ད་ནམ༌༌༌༌༌།

སྟོང་རྒྱན་ཚིག་གོ་ཡོམ་ཡོམ།

ལས་དོན་སྙིང་ནས་དཔྱིད་ཕྱིན།

ཕུགས་བྲག་ཆ་ཡི་རྗེས་འགྲོ

ལས་སྣེ་གཅིག་གི་རྩེ་དགར།

འཇུག་དོན་འབྲས་ཀྱི་འཚོ་སྙིང་།

དེ་ལ་རྒྱའི་སྲོག་མིན་ནམ༌༌༌༌༌།

དེ་ལ་རྒྱའི་སྲོག་མིན་ནམ།

འདི་ནི་ངའི་ཐོག་མའི་སེམས། ཁྱེད་ཉིད་ལ།

ལས་རླུང་ཞིག་གིས༌༌༌༌༌

འདི་ན་ཕྲད་ལ།

འདི་ནས་གྱེས།

ངས་ལས་འཕངས་ལ་ཇི་ལྟར་འཁང་།

འདི་ཉིད་དུ་གནས༌༌༌༌༌༌༌མཁྲེགས་འཛིན་ལ་དོན་ལྡན་པ་ངས་རྙེད།

ཅི་ཡ་མཚན་པ་ནི་སེམས་ཀྱི་ལ་རྒྱ་སྨུག་པོ།

དེས་དོགས་འཛེམས་དྲངས།

དེ་རང་གིས་ང་གཉིས་བར་ས་མཚམས་ཤིག་བསྐྲུན།

དེ་ལས་འཁྲིལ་མ་ཐུབ་པར་ལུས།

ཁ་ཡང་གྱེས།

གང་ལས་དྲན་གདུང་།

ཁྱོད་ལའང་ཡོད་པ་ངས་ཚོར།

ད་དུང་ངའི་རེ་མདངས་སྐྱ་བོ།

ཁྱོད་ཀྱི་དྲན་ངོས་སུ་རེག་གམ།

ལ་རྒྱ་སྨུག་པོ་དེའི་ཚུལ་འཆོས།

ཅི་འདྲའི་དགོད་བྲོ་བ་ལ།

རང་ས་འཛིན་ཁུལ་ཙམ།

འོན་ཀྱང་འཁྲུལ་མེད་ཀྱི་མཚན་མ་གཅིག་རང་།

འདྲེན་བྱེད་གཉིས་ཀྱི་ནང་།

སྦ་མི་ཤེས་པར།

ནང་གཏམ་གསལ་ལྷང་ལྷང་༌༌༌༌༌༌༌།

འདིར་འབྱོན་པ་ལེགས།

དྲ་ཐོག་ཟིན་བྲིས་འདི་བཞིན་ངས་གང་ནུས་གང་ཐུབ་ཀྱིས་རང་གི་ཕ་སྐད་ཁོ་ནའི་ཐོག་འབྲི་ཁུལ་བྱ་རྒྱུའི་འདུན་པ་ཞིག་བརྟས། དེ་ཡང་ཆེས་འགངས་གནད་དུ་གནས་པ་ནི་ཁྱེད་རྣམ་པའི་རྒྱབ་སྐྱོར་སྐུལ་ལྕག་ལགས་ན། དེ་བཞིན་གཟུ་བོ་བློའི་བརྩེ་མདངས་ལས་འཕོས་པའི་རམ་འདེགས་ལྷུག་གནང་བཀྲིན་ཆེ་བ་ཞུ།

རེད། རང་གི་ཟིན་བྲིས་གཞན་ཞིག་ཡོད་ཀྱང་དེར་ནི་ཕལ་ཆེར་དབྱིན་ཡིག་ཐོག་ཡིན་པ་ལས་རང་གི་ཕ་སྐད་ལ་བཅངས་པའི་འཁྲེན་སེམས་གསོན་པོ་ཞིག་ཡོད་སྐད་མངོན་ཙམ་ཚུན་ཆད་དགོས་པར་དམིགས་པ་ཡིན་ལགས། དེ་ཡང་སྐབས་རེས་འགྱངས་འགོར་འདྲ་བྱུང་ན་དགོངས་འགལ་མི་མངའ་བ་ཞུ།།